Ադրբեջանը Մարտակերտի շրջանում խախտել է շփման գիծը
Մարտակերտի շրջանում Ադրբեջանի կողմից շփման գծի խախտում է արձանագրվել։ Այս մասին ասվում է ՌԴ ՊՆ տեղեկատվական տեղեկագրում։
Ռուսական խաղաղապահ զորախմբի հրամանատարությունը Ադրբեջանի եւ Լեռնային Ղարաբաղի ներկայացուցիչների հետ համատեղ միջոցներ է ձեռնարկում միջադեպը կարգավորելու ուղղությամբ։
«Ռուսական խաղաղապահ զորախումբը շարունակում է առաջադրանքներ իրականացնել Լեռնային Ղարաբաղի տարածքում։
Քսանյոթ դիտակետերում ռուս խաղաղապահներն իրականացնում են իրավիճակի շուրջօրյա մոնիթորինգ եւ վերահսկում հրադադարի ռեժիմի պահպանումը։
Մարտակերտի շրջանի Յարըմջա բնակավայրի հատվածում Ադրբեջանի կողմից շփման գծի խախտում է արձանագրվել։ Ռուսական խաղաղապահ զորախումբը՝ Ադրբեջանի եւ Լեռնային Ղարաբաղի ներկայացուցիչների հետ համագործակցությամբ շարունակում է միջոցներ ձեռնարկել՝ միջադեպը կարգավերելու համար։
Ապահովվել է Լաչինի միջանցքով Ադրբեջանի Հանրապետության զինված ուժերի չորս շարասյան ուղեկցումը՝ երկուսը հյուսիսային, երկուսը՝ հարավային ուղղություններով։
Պարեկություն է իրականացվել Ասկերանի, Մարտակերտի, Մարտունու շրջաններում եւ Լաչինի միջանցքում:
Խաղաղապահ զորախմբի ինժեներասակրավորական խմբերը շարունակում են ականներից եւ չպայթած զինամթերքից տեղանքի ստուգումն ու մաքրումը: Օրվա ընթացքում մաքրվել է 1 հա տարածք։
2020թ․ նոյեմբերի 23-ից ընդհանուր առմամբ չպայթած ականներից եւ արկերից մաքրվել է 2368,3 հա տարածք, 689,5 կմ ճանապարհ, 1937 շինություն, հայտնաբերվել եւ վնասազերծվել է 26261 պայթունավտանգ առարկա։
Ռուս խաղաղապահների անվտանգությունն ապահովելու եւ հնարավոր միջադեպերը կանխելու համար Հայաստանի եւ Ադրբեջանի զինված ուժերի գլխավոր շտաբերի հետ շարունակական փոխգործակցություն է պահպանվում»,-ասվում է հաղորդագրության մեջ։