Այս պահին ադրբեջանցիների ձայները չկան. իրավիճակը՝ սահմանամերձ Խրամորթում
Խրամորթում այս պահին հանգիստ է․ չեն կրակում, ձայներ էլ չեն հանում։ Այս մասին «Փաստինֆո»-ին հայտնեց Արցախի ներքին գործերի նախարարության հասարակայնության հետ կապի և լրատվության ծառայության պետ Հունան Թադևոսյանը։ Նա նաև հույս հայտնեց, որ բանակցությունները, հավանաբար, արդյունք են տվել։
Հիշեցնենք, որ երեկվանից Արցախի Ասկերանի շրջանի Խրամորթ գյուղի հարևանությանբ տեղակայված ադրբեջանական դիրքից ադրբեջանցիները, փորձելով ահաբեկել գյուղի բնակիչներին, բարձրախոսներով ուժի կիրառման սպառնալիքով խրամորթցիներին «կոչ են արել» լքել հայրենի տները։ Ադրբեջանական կողմի սադրանքներին, բնականաբար, գյուղացիները, չեն տրվել։
Ժամեր առաջ Արցախի ՆԳՆ-ն հասարակայնության հետ կապի և լրատվության ծառայության պետ Հունան Թադևոսյանը գրառմամբ հայտնել էր, որ ոստիկանության Ասկերանի շրջանային բաժնի ծառայողներն ու խաղաղապահ առաքելության պատասխանատուները տեղում են և բանակցություններ են ընթանում։