Ինչպես է գիշերն անցել սահմանամերձ համայնքներում
Մենք կապվեցինք սահմանամերձ շրջանների համայնքապետերի հետ՝ հասկանալու համար, թե ինչպե՞ս է անցել գիշերը համայնքներում, արդյոք ադրբեջանցիները այս գիշեր էլ են կրակել համայնքների և մեր դիրքերի ուղղություններով։
Հիշեցնենք, որ նոյեմեբերի 20-ի գիշերը Ադրբեջանի զինված ուժերը կրակ էին բացել Գեղարքունիքի մարզի սահմանամերձ Կութի և Սոթքի դիրքերի ուղղությամբ, ինչպես նաև Արարատի մարզի Երասխ համայնքի ուղղությամբ, վիրավորվել էր Երասխի համայնքապետ Ռադիկ Օղիկյանը։
Կութի համայնքապետ Սիմա Չիտչյանը մեզ հետ զրույցում ասաց, որ գիշերը խաղաղ է անցել․
«Ոչ մի բան չի եղել, լրիվ նորմալ է, հանդարտ է անցել, օրվա ընթացքում էլ կրակոցներ չեն եղել, վերջինը երեկ գիշերվանն է եղել»,- ասաց Չիտչյանը։
Հարցրինք՝ իշխանության ներկայացուցիչներից որևէ մեկը գյուղ եկե՞լ է կրակոցներից հետո․ «Գյուղ չեն եկել, միգուցե դիրքեր գնացել են, բայց գյուղ չեն եկել»,- պատասխանեց համայնքապետը։
Նույնը ասացին Երասխի համայնքապետարանից, համայնքապետարանի աշխատակիցը վստահեցրեց, որ կրակոցներ չեն եղել, իսկ համայնքապետ Ռադիկ Օղիկյանը ապաքինվում է։