Մահացել է «Ուրվականների որսորդները» ֆիլմի ռեժիսորը
ԱՄՆ-ում 75 տարեկանում մահացել է կանադացի պրոդյուսեր եւ ռեժիսոր Այվան Ռայթմանը, հայտնում է «Associated Press» գործակալությունը՝ վկայակոչելով ռեժիսորի ընտանիքի խոսքերը։
Ռայթմանը մահացել է քնած ժամանակ շաբաթ օրը Մոնտեսիտոյում գտնվող իր բնակարանում՝ Կալիֆոռնիա նահանգ։ Մահվան պատճառը չի նշվում։
«Մեր ընտանիքը սգում է ամուսնու, հոր եւ պապիկի անսպասելի կորուստը, որը մեզ միշտ սովորեցնում էր կյանքում կախարդանք փնտրել։ Մենք մխիթարվում ենք նրանով, որ որպես ռեժիսոր նրա աշխատանքը ծիծաղ ու երջանկություն է բերել աշխարհում անհամար մարդկանց»,- ասված է նրա հարազատների հայտարարության մեջ։
Ռեժիսորը մեծ հայտնիություն է ձեռք բերել «Ուրվականների որսորդները» (Ghostbusters, 1984) ֆիլմի թողարկումից հետո։ Նա նկարահանել է նաեւ «Երկվորյակներ» (Twins, 1988), «Մանկապարտեզի ոստիկանը» (Kindergarten Cop, 1990), «Ջունիոր» (Junior, 1995), «Վեց օր, յոթ գիշեր» (Six Days Seven Nights, 1998) ժապավենները։