Ուկրաինան Ռուսաստանից պահանջում է «լռության» ռեժիմ ապահովել․ Վլադիմիր Զելենսկի

Ուկրաինան Ռուսաստանից պահանջում է «լռության» ռեժիմ ապահովել մարդասիրական երթուղիներից յուրաքանչյուրում։

Այս մասին այսօր՝ մարտի 12-ին, իր տեսաուղերձում ասել է Ուկրաինայի նախագահ Վլադիմիր Զելենսկին՝ պատերազմի 17-րդ օրը։

«Այս օրը մենք կրկին մարդասիրական բեռն ուղարկեցինք Մարիուպոլ: Մենք ամեն օր կփորձենք փրկել մեր ժողովրդին: Ես երախտապարտ եմ յուրաքանչյուր վարորդին, ով փորձում է իրականացնել այդ դժվարին առաքելությունը: Ես շնորհակալ եմ եկեղեցու այն ներկայացուցիչներին, ովքեր Մարիուպոլ տանող մարդասիրական միջանցքը գնդակոծությունից պաշտպանելու ջանքերին են միացել։ Ուկրաինական զորքերն իրենց հերթին երաշխավորում են լիակատար «լռություն»… Ռուսական կողմը պետք է «լռություն» ապահովի այս երթուղիներից յուրաքանչյուրում, հակառակ դեպքում, ի՞նչ կարող է երաշխավորել Ռուսաստանը՝ բոլորը ցանկացած բանակցությունների ժամանակ»,- ասել է պետության ղեկավարը։

Ուկրաինայի նախագահն ընդգծել է, որ «լռության» ռեժիմը պետք է լինի ողջ երթուղու երկայնքով, որպեսզի քաղաքների բնակիչները կարողանան սնունդ, ջուր և դեղամիջոցներ ձեռք բերել և մեկնել անվտանգ տարածք։ Սա վերաբերում է նաև Մարիուպոլիին և Ուկրաինայի կողմից նախատեսված այլ մարդասիրական միջանցքներին։

_______

Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:

ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։

Գերագույն Ռադան Ուկրաինայում ռազմական դրություն է մտցրել։