Ուկրաինան հայտնել է զոհերի և վիրավորների թիվը

Ուկրաինայում Ռուսաստանի ռազմական ներխուժման հետևանքով մահացել է 57 ուկրաինացի, ևս 169-ը վիրավորվել են: Այս մասին հայտնում է երկրի առողջապահության նախարարությունը, փոխանցում է ուկրաինական լրատվամիջոցը:

«Փետրվարի 24-ի դրությամբ Ռուսաստանի ներխուժման հետևանքով զոհվել է 57 ուկրաինացի, ևս 169-ը վիրավոր են», – ասված է առողջապահության նախարարության տարածած հայտարարության մեջ:

Միևնույն ժամանակ, ԱՆ-ի ղեկավար Վիկտոր Լյաշկոն հավելել է, որ իրենք անընդհատ համակարգում են, միմյանց օգնում են, որ բոլորը, ովքեր բժշկական օգնության կարիք ունեն, ստանան այն:

—————

Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հանդես է եկել ուղերձով՝ հայտնելով Դոնբասում հատուկ ռազմական օպերացիա սկսելու որոշման մասին։

«Հանգամանքները մեզնից պահանջում են վճռական ու անհապաղ գործողություններ: Դոնբասի ժողովրդական հանրապետությունները խնդրանքով դիմել են Ռուսաստանին: Դրա հետ կապված որոշում եմ ընդունել հատուկ ռազմական գործողություն իրականացնել»,- հայտարարել է Պուտինը ՌԴ քաղաքացիներին ուղղված հեռուստաուղերձում:

Ուկրաինայի զինված ուժերի գլխավոր շտաբը հայտնել է, որ հինգշաբթի ժամը 05:00-ից (Երևանի ժամանակով 07:00-ից) ՌԴ ԶՈւ-ն ինտենսիվ հարձակումներ է իրականացնում ուկրաինական ռազմական օբյեկտների և օդանավակայանների վրա։

Գերագույն Ռադան Ուկրաինայում ռազմական դրություն է մտցրել։