ՌԴ ՊՆ-ն հայտնել է ուկրաինական երեք ԱԹՍ-ի, այդ թվում՝ «Բայրաքթարի» ոչնչացման մասին (տեսանյութ)
ՌԴ ՊՆ պաշտոնական ներկայացուցիչ Իգոր Կոնաշենկովը հայտնել է, որ ռուսական հակաօդային պաշտպանության համակարգերը օդում խոցել են ուկրաինական երեք անօդաչու թռչող սարքեր (ԱԹՍ), այդ թվում՝ «Բայրաքթար ՏԲ2»։
Նա հավելել է, որ երկու անօդաչու թռչող սարքը խոցվել է Մարիուպոլի և Կալինինի, իսկ «Բայրաքթար ՏԲ2»-ը՝ Սախնովշչինայի շրջանում։
Կոնաշենկովի խոսքով՝ անցած օրվա ընթացքում ՌԴ օդատիեզերական ուժերի և հրթիռային ուժերի օպերատիվ-մարտավարական ավիացիան խոցել է Ուկրաինայի 65 ռազմական օբյեկտ, այդ թվում՝ չորս հրամանատարական կետեր և կապի կենտրոններ, երեք նյութատեխնիկական պահեստներ, ինչպես նաև 41 հենակետ և ուկրաինական ռազմական տեխնիկայի կենտրոնացման շրջաններ։
Նախարարության հաշվարկներով՝ հատուկ ռազմական գործողության սկզբից ոչնչացվել է 127 ինքնաթիռ, 98 ուղղաթիռ, 428 անօդաչու թռչող սարք և 2037 տանկ և այլ զրահատեխնիկա։