Սպասվում է հոսպիտալացումների և մահացությունների աճ․ ԱՀԿ
ԱՀԿ-ն կանխատեսում է «օմիկրոն» շտամի հետագա տարածում, ՌԻԱ Նովոստիին հայտնել են կազմակերպության մամուլի ծառայությունից։
«Ողջ աշխարհում դեպքերի աճի հետ մեկտեղ՝ մենք ակնկալում ենք, որ կլսենք նաև հոսպիտալացված դեպքերի և նույնիսկ մահվան դեպքերի թվի աճի մասին»,- հավելել են գործակալության զրուցակիցները։
Նախօրեին Մեծ Բրիտանիան հայտարարեց «օմիկրոնից» առաջին մահվան մասին։
«Շատ երկրներ դեռևս չունեն բոլոր վարակների կամ մահերի դեպքերը հետևողականորեն վերլուծելու հնարավորություն, ուստի որոշակի տարբերակի հետևանքով առաջացած մահերի մասին տեղեկատվությունը դժվար է ճշգրիտ տրամադրել», - ասել է ԱՀԿ ներկայացուցիչը:
«Օմիկրոնի» ծանրության մասին ավելի մանրամասն տվյալներ կարող են հայտնվել առաջիկա շաբաթների ընթացքում՝ պայմանավորված այն հանգամանքով, որ վարակի տարածման և հետևանքների միջև պետք է որոշակի ժամանակ լինի։