Վարորդը մոխիր էր դարձել, մյուսները վախեցած փախնում էին. Անատի Սաքանյան

Դերասանուհի Անատի Սաքանյանն այսօր Ինստագրամի սթորի բաժնում հրդեհի սարսափելի կադրեր է հրապարակել, հետո պարզաբանել, որ այրվում է դիմացի շենքը, որտեղ պարզվում է՝ բնակվում է նրա հորաքրոջ ընտանիքը: Armlady-ին կապ է հաստատել դերասանուհու հետ՝ պարզելու՝ ինչ էր կատարվում իրականում.

«Ես տուն գալու ճանապարհին էի, երբ մայրս զանգեց ու ասաց, որպեսզի շրջանցեմ այդ հատվածը, քանի որ այրվում էր մեր դիմացի շենքը: Երբ հասա խաչմերուկ տեսա, որ այրվում էր այն շենքը, որը շատ մոտ է հորաքրոջս շենքին, սարսափից ոտքերս սկսեցին դողալ և մի պահ կորցրեցի մեքենայիս կառավարումը: Չեմ հիշում ինչպես եմ հասել մեր շենքի մոտ»,-պատմում է Անատին, ով դեռևս չի կարողանում ուշքի գալ տեսածից:

«Այդ պահին ես միայն մտածում էի՝ ինչ վիճակում են հարազատներս, որովհետև ես տեսնում էի՝ ինչ խուճապահար են մարդիկ դուրս գալիս շենքից, մարդիկ երեխաներին գրկած վազում էին դուրս, սարսափելի տեսարան էր: Հետո 3-4 հրշեջների մարտական հաշվարկ եկավ: Վարորդը, որ բախվել էր գազախողովակին մոխիր էր դարձել և չէր հաջողվել նրան փրկել, երկու հոգի էլ վիրավոր էր: Ես դեռ չեմ կարողանում ուշքի գալ կատարվածից, շուրջս աղմուկ էր, բոլորը գոռում էին, լացում». Եզրափակեց Անատին:

Նշենք, որ այսօր ողբերգական դեպք էր տեղի ունեցել: Ժամը 18։50-ի սահմաններում Opel մակնիշի ավտոմեքենան Արտաշիսյան փողոցում դուրս է եկել ճանապարհի երթևեկելի գոտուց, բախվել 44/4 շենքի դիմաց տեղադրված գազախողովակին։ Բռնկված կրակի հետևանքով շենքի 30-ից ավելի բնակարանների պատշգամբներ, լուսամուտներ վնասվել են։