Վորոնեժում ինը հարկանի շենքում գազի պայթյունից երկու մարդ է մահացել
Վորոնեժում ինը հարկանի շենքում գազի պայթյունից երկու մարդ է մահացել, հաղորդում է «Интерфакс»-ը՝ հղում անելով ՌԴ արտակարգ իրավիճակների նախարարության մամուլի ծառայությանը։
ՌԴ ԱԻՆ-ը պարզաբանել է, որ պայթյունը տեղի է ունեցել Խոլզունովի փողոցի 88 հասցեում գտնվող ինը հարկանի, տասներկու մուտքով բնակելի շենքում։ Պայթյունից հետո հրդեհ է բռնկվել։ Երրորդ եւ չորրորդ հարկերի միջեւ հատակը փլուզվել է։
«Նախնական տվյալներով՝ երկու մարդ մահացել է այն բնակարանում, որտեղ տեղի է ունեցել փլուզումը»,- հայտնել է մամուլի ծառայությունը։
Տարհանվել է 113 մարդ։ Այժմ հրդեհը մեկուսացված է։
Վորոնեժի քաղաքապետ Վադիմ Կստենինը հայտնել է, որ հարեւան դպրոցում ժամանակավոր կացարան է բացվելու այն քաղաքացիների համար, որոնք ժամանակավոր կացարանների կարիք ունեն։