Հակառակորդը կրակում է բնակավայրերից և իր հրետանային համակարգերը տեղակայում բնակելի շենքերի մոտ. Ուկրաինայի ՊՆ

Փետրվարի 19-ի ժամը 22.00-ի դրությամբ, ռուսական ուժերի կողմից արձանագրվել է 122 խախտում, որից 108-ը՝ Մինսկի համաձայնագրերով արգելված զինատեսակներով։ Այս մասին հայտնում է Ուկրաինայի պաշտպանության նախարարությունը:

Հակառակորդը կիրառել է 152 մմ և 122 մմ հրետանային համակարգեր, 120 մմ և 82 մմ ականանետեր, տարբեր համակարգերի նռնականետեր, տանկային զենքեր և խոշոր տրամաչափի գնդացիրներ։ Արձանագրվել է նաև հակառակորդի անօդաչու թռչող սարքերի երեք թռիչք՝ հավանաբար Օռլան-10-ով։

Հակառակորդը նենգաբար կրակում է բնակավայրերից և իր հրետանային համակարգերը տեղակայում բնակելի շենքերի մոտ։ Դրանով հակառակորդը փորձում է ստիպել Ուկրաինայի Զինված ուժերի ստորաբաժանումներին պատասխան կրակ բացել՝ ուկրաինացի պաշտպաններին կրկին մեղադրելու խաղաղ բնակչությանը գնդակոծելու մեջ։

Ընդգծում ենք, որ միացյալ ուժերը կրակ չեն բացում քաղաքացիական ենթակառուցվածքների վրա և հավատարիմ են միջազգային մարդասիրական իրավունքի նորմերին։

Հրթիռակոծության արդյունքում երկու ուկրաինացի զինծառայողներ կյանքի հետ անհամատեղելի բեկորային վնասվածքներ են ստացել։ Չորս զինծառայող ստացել է տարբեր աստիճանի ծանրության վնասվածքներ և գտնվում են բուժհաստատություններում։ Միացյալ ուժերի հրամանատարությունն իր անկեղծ և խորին ցավակցությունն է հայտնում զոհվածների ընտանիքներին և ընկերներին։

Դաշնակից ուժերը վերահսկում են իրավիճակը և համարժեք արձագանքում հակառակորդի կողմից հնարավոր սպառնալիքներին։