Ինչու՞ է կորոնավիրուսի «դելտա» շտամը համարվում առավել վտանգավոր

Կորոնավիրուսի «դելտա» շտամն այսօր մեծ տարածում ունի աշխարհում: Հայաստանում եւս արդեն գրանցվել են այս շտամով վարակվածության դեպքեր:

Ի՞նչ է իրենից ներկայացնում այս շտամը, եւ ինչո՞ւ է այն համարվում ամենավտանգավորը:

«Դելտա» շտամով վարակման առաջին դեպքը գրանցվել է Հնդկաստանում (Մահարաշտրա նահանգ), ուստի այն նաեւ կոչվում է հնդկական շտամ: Այս տարբերակը կրում է միանգամից երկու այլ մուտացիաների գենետիկական ծածկագիրը, ինչը հեշտացնում է դրա ներթափանցումը մարդու օրգանիզմ:

Նոր շտամը ունի մի շարք առանձնահատկություններ.

Արագ փոխանցում

ԱՀԿ-ի տվյալներով՝ «դելտա» շտամի փոխանցման արագությունը մոտ 40 տոկոսով բարձր է, քան «ալֆա» տարբերակինը (բրիտանական շտամ), որն իր հերթին 40 տոկոսով ավելի վարակիչ է, քան վարակի սկզբնական շտամը:

Բարդությունների ծանրությունը

Համարվում է, որ «դելտա» տարբերակով վարակը ուղեկցվում է հիվանդության ավելի ծանր ընթացքով եւ բարդություններով, քան վարակի նախորդ շտամները: «Դելտան», փորձագետների խոսքով, կարող է հոսպիտալացված հիվանդների թվի աճի պատճառ դառնալ: Բացի այդ, վարակված հիվանդների մոտ թրոմբի առաջացման եւ այլ բարդությունների բարձր ռիսկ կա:

Ախտանիշներ

«Դելտա» շտամով վարակվելու դեպքում կարող են առաջանալ հետեւյալ ախտանիշները.

փորացավ,
ախորժակի կորուստ, սրտխառնոց եւ փսխում,
ստամոքսի հետ կապված լուրջ խնդիրներ,
լսողության կորուստ,
հոդացավեր,
հարբուխ,
կոկորդի ցավ:

«Դելտա» տարբերակը եւ պատվաստանյութերը

Գիտնականները հնարավոր են համարում, որ պատվաստանյութերը կարող են այնքան էլ արդյունավետ չլինել կորոնավիրուսի մուտացիայի ենթարկված նոր տարբերակների, այդ թվում՝ «դելտայի» դեմ: Հետազոտության տվյալների համաձայն՝ այս շտամն ունի մուտացիաներ, որոնք թույլ են տալիս դրան խուսափել պատվաստանյութերի կամ կորոնավիրուսային վարակի հետեւանքով առաջացած հակամարմիններից: Միեւնույն ժամանակ, պատվաստանյութի երկու չափաբաժինների ներարկմամբ պայմանավորված իմունիտետի ձեւավորումից հետո շատ մարդկանց պաշտպանվածությունը վարակից կարող է զգալի մակարդակի հասնել: